Ямар ч ажлын үед өмнө хийсэн зүйлээ ашиглах явдал байнга гардаг. Хүний дадлага туршлага ч гэсэн нэг ажлыг давтан хийснээр бий болдог. Энэ бүхнийг та бидний өдөр бүр ажилдаа ашигладаг программуудад суулган өгөхгүй бол түүнийг ашиглахад хүндрэлтэй болох нь мэдээж. Өмнө нь хийсэн зүйлээ ашиглахад зориулагдсан командууд бол хуулаад, оруулан ирэх Copy / Paste хэрэгсэл юм. Үүнийг алдарт гэдгийн учир нь командын ачаар зарим нэгэн хүн даргадаа үнэлэгдэн тушаал дэвшиж байхад зарим нэг нь ажилгүй болох нь ч бий. Сэргэлэн нэгэн хэн нэгний хийсэн зүйлийг копи пэст хийгээд жаахан засварлаад өөрөө хийсэн болгоод коко авч байхад нөгөө азгүйчүүд буруу зөрүү зүйлтэй нь копи пэст хийгээд халагдах жишээтэй. Эндээс дүгнэвэл энэхүү юугаар ч сольшгүй ач тустай командыг хэрхэн зөв ашиглахаас л бүх юм эхлэхээр байгаа биз.
Манай хэрэглэгчид алдарт командыг хэтэрхий ихээр хэрэглэснээс өөрөө юм хийх чадвараа алдаад байх шиг. Ер нь бол хүн өөрийн хийсэн зүйлээ давтан хийхгүйгээр ашиглахад гол нь зориулагдсан эд шүү дээ. Хэт ихээр хамаагүй ашиглах нь хортой.
Надад тохиолдсон нэгэн түүх.
Би нэг байгууллагаас тодорхойлолт авсан юм л даа. Нилээд нэр хүндтэйд орох байгууллага шүү. Би тухайн газартаа итгээд тодорхойлолтоо сайн шалгасангүй. Тодорхойлолтоо аваачин өгөх газраа ирээд хүлээж суухдаа нөгөө бичгээ унштал эхлээд надад гаргасан тодорхойлолт явж байснаа сүүл хэсэгтээ өөр хүний зүйлүүд болоод явдаг байна шүү. За яахав дахиад буцалтай биш гэж бодоод нөгөө газраа өгсөн чинь хүлээн авч байгаа хүн маань тоохгүй л авчихсан. За нэг иймэрхүү түүх.
Энэ бол нөгөө алдарт командыг хэтрүүлэн ашиглаж байгаагийн нэг тод жишээ юм. Миний тодорхойлолт ч яахав. Чухал албан бичиг, материал байсан бол ажлаасаа хусагдана шүү дээ ккк. Гэхдээ бүгд үүнийг мэддэг болохоор бараг алдаа гэж тооцохгүй болоод байгаа нь бүр хачирхалтай.
Тэгвэл энэхүү чухал командыг хэзээ ямар үед ашиглах, яаж зөв ашиглаж гэсэн асуудал гарч ирнэ. Их хэмжээний материал боловсруулах, орчуулга хийх, ишлэл оруулан ирэх зэрэгт копи пэстээс хэрэгтэй зүйл гэж үгүй. Харин нэг ижил төрлийн бичиг, тушаал, баримт, тодорхойлолт гэх зүйлүүдийг копи пэстээр хийх нь асуудал үүсгэх гол шалтгаан болдог. Тогтсон загвартай маягт ашиглахдаа манай хэрэглэгчид word, excell -ийн файлуудыг шууд хэв болгон ашиглах нь элбэг. Энд копи пэст ашигласнаар хэзээ нэгэн цагт та алдаа гаргах нь 90 түүнээс дээш хувийн магадлалтай. Нэг хэвийн маягтуудыг оффисын программд теймплейт үүсгэн ашиглах боломжтой. Үүнийг ашигласнаар та ямар нэгэн алдаа гаргах магадлал маш бага болно. Темплейт гэдгийг таны маягтын цэвэр хэв гэж ойлгох хэрэгтэй. Тэнд тухайн маягт дээр байнга байдаг үгнүүд л байна. Түүнээс тодорхой хэн нэгний мэдээлэл, өөр бусад агуулга ерөөсөө байхгүй. Ийм болохоор та өөрөө л алдаа гаргахгүй бол буруу зүйл хийгдэнэ гэж айх хэрэггүй. Энэхүү хэрэгслийг ашиглахыг хүсвэл Темплейтийг хэрхэн үүсгэх, ашиглах хичээлийг үзээрэй.